22.03.2019 “Прыйдзі вясна жаданая” У рамках выканання гадавога плану работы ўстановы дашкольнай адукацыі, з мэтай пашырэння сферы выкарыстання беларускай мовы, яе папулярызацыі, прайшло музычнае свята “Гуканне вясны”. Вядучыя свята запрасілі дзяцей: Гэй, вясёлы наш народ, Станавіся ў карагод! Будзем песні спяваць, Будзем сонца вітаць, Вясну-красну гукаць! Выхаванцы разам з педагогамі вадзілі карагоды, спявалі песні, чыталі вершы, гралі на дзіцячых музычных інструментах. На свята да дзяцей завітала Вясна-красна, якая загадвала загадкі, танчыла з дзяўчынкамі з першымі веснавымі кветкамі, гуляла з дзецьмі ў беларускія рухомыя гульні. Актыўны ўдзел прынялі і бацькі, якія прыйшлі на свята. Яны спявалі песню – гукалі вясну, загадвалі дзецям загадкі пра беларускіх птушак, называлі свае імёны, а таксама імёны сваіх дзяцей на беларускай мове. На прыканцы свята дзеці атрымалі пачастункі: птушачак – прадвеснікаў вясны, бо свята праходзіла на Саракі – прысвятак, які заўсёды святкуюць у Беларусі 22 сакавіка. Шуміць, гудзе, Вясна ідзе, Шчасце і радасць людзям нясе. Усе, хто прысутнічаў на свяце, атрымалі шмат добрых ураджанняў. Мы ўпэўнены, што кожны чалавек павінен ведаць родную мову, праказкі і прымаўкі свайго народа, умець спяваць народныя песні, гуляць у беларускія рухомыя гульні, цікавіцца, як беларусы спрадвеку адзначалі святы ў родным краі, з чым мы і знаёмім нашых выхаванцаў. Дык чаруй жа людзей паміж моваў другіх І гучы вечна, ярка і нова Мова продкаў маіх і нашчадкаў маіх – Беларуская родная мова! Алесь Ставер.